އިބްރާހިމް އަޙްމަދު
އިންސާނާއަކީ އޭނާގެ ޙަޔާތުގައި ތަފާތު އެތައް ކަންތަކާ ކުރިމަތިލާންޖެހޭ މަޚްލޫގެކެވެ. ތަފާތު އިޙްސާސްތަކެއްގެ މައްޗަށް ބިނާވެފައިވާ، ތަފާތު ވިސްނުންތަކެއް ތަފާތު ވަގުތުތަކުގައި ނުވަތަ ޙާލަތް ތަކުގައި އިންސާނާއަށް ކުރިމަތިވެއެވެ. ބައެއްފަހަރު ހިތާމައެވެ. އަނެއްބައިފަހަރު އުފާވެރިކަމެވެ. އަނެއްބައިފަހަރު ރުޅިވެރިކަމެވެ. އެހެންނަމަވެސް ހިތާމަކީ ތިމާއަށް ދިމާވާ މިފަދަ ތަފާތު އިޙްސާސްތަކާމެދު އަމިއްލަ ނަފްސާ ސުވާލުކޮށް، ތިމާއާ މިފަދަ އިޙްސާސްތަކާ ކުރިމަތިލާންޖެހޭ ޙަޤީގީ ސަބަބު ހޯދަން އަމިއްލައަށް މަސައްކަތް ނުކުރެވުމެވެ. އޭގެ ބަދަލުގައި އަމިއްލަ ނަފްސަށް ކުރަންޖެހޭ އިތުބާރު ކަނޑުވާލާ، ނުވިތާކަށް މުޅި ޙަޔާތް އޮޔާލާދާން ފުރުޞަތު ދިނުމެވެ.ތިމާއަކީ އެއްވެސް މީހެއް ނޫންކަމުގެ އިޙްސާސް ކުރެވެން ފެށުމެވެ. ޙާއްސަކޮށް އަޅުގަނޑުމެން ޒުވާނުންނެވެ
.
.
މީގެތެރެއިންވެސް އަޅުގަނޑު ފާހަގަކޮށްލަން ބޭނުންވަނީ ޒުވާން އުމުރުފުރައިގެ އަންހެންކުދިންނެވެ. އަޅުގަނޑުމެން އެންމެންވެސްދަންނަ " ޓީނޭޖް " އުމުރުން ނެއްޓި އެންމެ ޗާަލާ އުމުރަށްދާ ޒުވާނުންނެވެ. މިއުމުރުގެ ކުދިންގެ އެންމެ މައިގަނޑު އެއްކަމަކީ އެކުދިންގެ ލޯބީގެ ފަލްސަފާއެވެ.ސްކޫލްދައުރު ނިންމުމަށްފަހު ތިމަންނާއަކީ މިހާރު ބޮޑުކުއްޖެކޭ އަމިއްލައަށްބުނެ ފަޚްރުވެރިވެއެވެ. އަދި ލޯބީގެ މައިމަރުކަޒު ކަމައްވާ ހިތުގެ އަޅަކަށް ވެދެއެވެ. ލޯތްބަކީ ހުރިހާ އެއްޗެއްކަމަށް އޭނާ ހަދައެވެ. އޭނާގެ ފުރާނައަކީވެސް ލޯބިކަމުގައި އޭނާހަދައެވެ. އޭނާގެ ކެއުމާއި ބުއިން، އަދި އެހެނިހެން ކަންތައްވެސް އެއީ ލޯބީގެ ޤާނޫނުގެ ދަށުން ކުރަންޖެހޭ ކަންތަކެއްކަމުގައި އޭނާ ދެކެއެވެ. ލޯބި ނުލިބިއްޖެނަމަ ދުނިޔެ މަތިންވެސް ފޫހިވެއެވެ. އޭނާއަށް ހީކުރެވޭ ގޮތުގައި އެހިސާބުން ދުނިޔޭގެ ނުވަތަ ޙަޔާތުގެ ބޭނުމެއް ނޯވެއެވެ. މިވިސްނުން ޢާއްމުގޮތުގައި ގެންގުޅޭ ކުދިން ދެކޭގޮތުގައި ލޯތްބަކީ ވެވޭ އެއްޗެކެވެ. އެހެން ނަމަވެސް އަޅުގަނޑުގެ ޚިޔާލު ވަރަށް ތަފާތެވެ. ލޯތްބަކީ ވެވޭ އަދި ވާން ބޭނުންވެއްޖެ ހިނދެއްގައި އަމިއްލައަށް ވެވިދާނެ އެއްޗެކެވެ.
އަޅުގަނޑުމެންގެ ތެރެއިން ގިނަޒުވާނުން ކުދިންނާ ރައްޓެހިވަނީ ( ބިޓުން ނަގަނީ ) ގިނަފަހަރަށް ފެންނަފެނުމުން އަޅައިގަންނަ ގޮތެއް ހުރެގެންނެވެ. ފުރަތަމަދުވަހު ކުއްޖަކު ފެނުމުން އޭނާގެ ނަންބަރު ހޯދައި ގުޅާނެއެވެ. އެއަށްފަހު ވަރަށްގިނަ ވާހަކަތައް ދައްކައި ހަދާނެއެވެ. ހަނދުން މުސަޅުވެސް ދައްކާނެއެވެ. ކަނޑުގެ އޮޔާ ދުނިޔޭގެ ވަޔަކީ ޙަޔާތުގެ ރާގުކަމުގައި ސާބިތު ކޮށްދޭނެއެވެ. އެއަށްފަހު ދެމީހުން ރައްޓެހި ވާނެއެވެ. އެކަކު އަނެކަކަށް ވަޢުދުތައް ވާނެއެވެ. އެކުގައި މެނުވީ ނިމިގެން ނުދާން އަޙުދު ކަށްވަރު ކުރާނެއެވެ. އަދިވެސް ޙަޤީގަތުގައި ލޯތްބެއް ނުވެއެވެ. މިވަޢުދުތަކާއި އަޙުދު ތަކަކީ ތިމާކުއްޖަކާ ރައްޓެހިވެގެން އުޅޭތީ ވާ ވަޢުދުތަކެކެވެ. ތިމާއަކީ މަކަރުވެރި މީހެކޭ ބުނާނެ ފުރުޞަތެއް އަނެކާއަށް ނުދިނުމަށެވެ.
ލޯބިވެވެނީ އެކަކު އަނެކަކަށް އަޅާލާ، އިޙްތިރާމްކޮށް، ތެދުވެރިވެ، ރުހުމާ، ކުލުނާ، އޯގާތެރިކަމާ ހިންހެޔޮކަން ދިނުމުންނެވެ. ތިމާއަށް ހެޔޮއެދި އޯގާތެރިވާ ކޮންމެ މީހަކުދެކެ އިންސާނުން ލޯބިވެއެވެ. އެލޯބީގެ އަގެއްގެ ގޮތުން އޭނާވެސް އަނެކާއަށް އެ އޯގާތެރިކަމާ ރުހުން ދެއެވެ. މީގެސަބަބުން ދެމީހުންގެ މެދުގައި ވަރުގަދަ ގުޅުމެއް ޤާއިމްވެއެވެ. ދުވަހަކުވެސް ނުގުޑާފަދަ ޢަޒުމެއް ދެމީހުންގެ ސިކުނޑީގައި އަށަގަނެއެވެ. އެއަށްފަހު އެގުޅުމަށް ނަމެއްދީ ލޯބީގެ ޤާނޫނުގެ ދަށުން ރަޖިސްޓްރީކުރެއެވެ. އެނަމަކީ އިޝްޤީ ލޯތްބެވެ. ބައެއް ކުދިން ދެކޭގޮތުގައި ލޯބިވެވެނީ ޙަޔާތުގައި އެކަކުދެކެ އެންމެ ފަހަރަކުއެވެ. އެކަމަކު މިވެސް ޙަޤީގަތެއް އޮތް ވާހަކައެއްނޫނެވެ. އެއްފަހަރާ ދެމީހުން ދެކެވެސް ލޯބިވެވިދާނެއެވެ. ދެފަހަރާ ދެމީހުން ދެކެވެސް ލޯބިވެއެވެ. މިހެން ވުމުގެ ޙަޤީގީ ސަބަބަކީ ލޯބީގެ ގުޅުމަކީ ރޫޙީ ގުޅުމެއްކަމަށްވުމެވެ. އެހެނީ ނުފެންނަ މީހެއްދެކެ ލޯބިވާ ފަހަރުވެސް އާދެއެވެ. މީގެ ހެއްކަކީ މިހާރަކަށް އައިސް ކާކުކަން ނޭގި ފޯނުން ގުޅޭމީހުން ދެކެވެސް ލޯބިވެ، އެންމެ ފަހުން ކައިވެނިކޮށް އެކުގައި މުޅިޙަޔާތް އުފަލުގައި ވޭތުކުރަމުންދާ ޒުވާނުންވެސް އަޅުގަނޑުމެންގެ މިމުޖްތަމަޢުގައި މިޙާރު އުޅެމުންގެންދާ ކަމެވެ.
ކުރިން ބުނެވިދިޔަ ފަދައިން ދެލޯބިވެރިން ވަރަށް ލޯބިން ދުވަސްތަކެއް ގުނަމުން ދަނިކޮށް ކޮންމެވެސް އެކަކު ބޭވަފާތެރިވެއެވެ. ގިނަފަހަރަށް ފިރިހެން ކުދިންނެވެ. ހަޤީގަތުގައި ބޭވަފާތެރިވަނީކީއެއްވެސް ނޫނެވެ. ލިބޭ އުފަލަކަށްޓަކައި ނުވަތަ ހިންހަމަޖެހުމަކަށްޓަކައި ފެންނަ ރީތިއަންހެން ކުއްޖަކާ ރައްޓެހިވަނީއެވެ. ލޯާބިވެގެނެއް ނޫނެވެ. ލޯބިވަނީ ހަމަ އެއްކުއްޖެއްދެކެވެ. އެހެން ނަމަވެސް އަންހެން ކުއްޖާއަށް އޭނާގެ ލޯބިވެރިޔާއާ އެހެންމީހަކާ ގުޅުމެއް އޮންނަކަން އެނގުމުން ލިބޭ ހިތްދަތިކަމާ އަންނަރުޅިއެއްގެ ސަބަބުން، ކަމުގެ ޙަޤީގަތް ސާފުކުރުމަށްވުރެ ބޮޑަށް މަސައްކަތް ކުރެވެނީ ރުޅި އިސްކުރުމަށެވެ. އެއީ އެކަންތަށް ވާނެގޮތްވެސް މެއެވެ. ރުޅިއަކީ ބާރުގަދަ އިޙްސާސެކެވެ. އެހެންވުމުގެ ސަބަބުން "ރުޅި" މިޙާލަތުގައި ކުރިހޯދައެވެ. ނަތީޖާއަކީ މައްސަލަބޮޑަށް ގޯސް ވުމެއެވެ. ދާންޖެހޭ މިސްރާބުނޫން މިސްރާބަކަށް ދިއުމެވެ. މިޙާލަތުގައި ފިރިހެން ކުއްޖާއަށްވެސް ވިސްނޭނީ ކަމުގެ އެންމެ ނެގެޓިވް ( ނުބައި ) ގޮތަށެވެ. އޭނާއަށް ހީކުރެވޭނީ ތިމަންނަ އަތުން ކުށެއް ކުރެވުނަސް ތިމަންނަގެ ލޯބިވެރިޔާ ތިމަންނައަށް މާފްކޮށް ނަސޭޙަތްދީ ތިމަންނަގެ ގައިގައި ހުންނަ ގޯސްކަންތައް އިސްލާޙު ކުރުމަށް މަސައްކަތެއް ނުކުރާކެމެވެ. އަދި އޭނާދެކެ ލޯބިނުވާކަމުގެ އިޙްސާސް ކުރެވެއެވެ. އޭނާގެ ލޯބިވެރިޔާ އޭނާއަށް އިތުބާރު ނުކުރާކަމުގެ އިޙްސާސް ކުރެވެން ފެށުމެވެ. ނަތީޖާއަކީ އެހެންމީހެއްގެ ފަރާތުން އޯގާތެރިކަމާއި ރުހުން ހޯދުމުގެ ވިސްނުން އައުމެވެ. އެންމެ ފުރަތަމަ ނަޒަރުވެސް ގޮސް ހުއްޓޭނީ އެއްކަލަ މަޖަލަކަށް ރައްޓެހިވި ކުއްޖާއަށެވެ. އެކުއްޖާގެ ފަރާތުން އޯގާތެރިކަމާއި ލޯބި ހޯދައެވެ. އަދި ކުރިން އެހެންމީހަކަށް ދެވިފައިވާ ލޯބި ފަހުން ދެވަނަ ފަރާތަކަށް ހިބަކުރެވެއެވެ.
މީގެ ސަބަބުން އަންހެން ކުއްޖާއަށް ފުންއަސަރުތަކެއް ކުރެއެވެ. އަދި ހިތުގެ ވޭންތަކަށް ކެތްނުކުރެވޭ ޙާލަތަށް ދެއެވެ. ދުނިޔެމަތިން ފޫހިވެއެވެ. ކެއުމާއި ބުއިމުގެ މަތިން ފޫހިވެއެވެ. އުފަލާ މަޖަލަކީ ނޯންނަ އެއްޖެއްކަމަށް ހަދައެވެ. އޭނާއަށް ޤަބޫލުކުރެވޭ ގޮތުގައި ޙަޔާތަކީ އަމުދުން ނުވާ އެއްޗެކެވެ. ފެށުމުގައި ފާހަގަ ކުރެވުނު ފަދައިން އިޙްސާސްތަކާމެދު ވިސްނުމެއްނެތެވެ ނެތެވެ. އަމިއްލަ ނަފްސާ ވާހަކަދެއްކުމެއް ނުވަތަ ސުވާލުކޮށްލުމުގެ ވިސްނުމެއް ނުގެންގުޅުއެވެ. އޭނާގެ ޙަޔާތުގެ ވަގުތު ނުމުނީއެވެ. ދުނިޔޭގައި ކުރަންޖެހޭ ކަންތައް ނިމުނީއެވެ.
އޭ... ލޯބީގެ ޤާނޫނުގެ ދަށުގައި އަޅުދާސްތުވެފައިވާ އާޝިގާއެވެ...! އަޑުއަހާށެވެ.." ލޯބީގެ ޤާނޫނަށްވުރެ މާބޮޑު އަދި މާބާރުގަދަ ޤާނޫނެއް ވެއެވެ. ޙަޔާތުގެ ޤާނޫނެވެ. ލޯބީގެ ޤާނޫނަކީ ޙަޔާތުގެ ޤާނޫނަށްފަހު އަންނަ އެއްޗެކެވެ. ލޯތްބަކީ ތިޔަހީކުރާ "ހިތުން" ވާ އެއްޗެއް ނޫނެވެ. ގުޅުންތަކަކީ ( ރިލޭޝަން ) ރޫޙީ ކަމެކެވެ. އިންސާނާގެ ނަފްސު ކުރާ ކޮންމެ ކަމަކީވެސް ސިކުނޑި ކުރަމުންގެންދާ ކަންތަކެކެވެ. އެގޮތުން ލޯތްބަކީވެސް ސިކުނޑި ހިންގާ އޮޕަރޭޝަނެކެވެ. އިމްތިހާނެކެވެ. އަހަރެމެން މޮޔަ އިންސާނުން ލޯތްބަކީ މާބާރުގަދަ އެއްޗެއް ކަމަށް ހަދައިގެން އުޅެނީއެވެ. ލޯބީގެ މައްޗަށް އަހަރެމެންނަށް ބާރު ހިންގިދާނެއެވެ. ކުރަންވީ ހަމައެކަނިކަމަކީ ސިކުނޑި އޭގެ އެންމެ ހެޔޮގޮަތުގައި ބޭނުން ކުރުމެވެ. އަހަރެމެން މިދުނިޔެއަށް އައީ އުފާވެރި އަދި ބާއްޖަވެރި ޙަަޔާތެއް ހޭދަކުރުމަށެވެ. ކުރިން ފާހަގަ ކުރެވުނު ފަދައިން، ލޯތްބަކީ ކޮންމެ މީހެއްދެކެވެސް ވެވިދާނެ އަދި ކޮންމެމީހެއްގެ ފަރާތުން ލިބިވެސްދާނެ އެއްޗެއްކަން ޤަބޫލުކުރުމެވެ. ހަވަނަ ޙިއްސެއްގެ ބޭނުންކުރުމެވެ. ތިމާގެ ޙަޔާތުގެ ބައިވެރިޔާއަށް ލޯބިދޭށެވެ. އޯގާތެރިކަމާ އެހީތެރިކަން ދޭށެވެ. ތެދުވެރި މީހާކަށް ވާށެވެ. އޭނާގެ އިތުބާރު ހޯދާށެވެ. އޭރުން އިންޝާﷲ އޭނާގެ ލޯބި ތިބާއަށް ލިބި، ތިބާގެ ޙަޔާތް ބާއްޖެވެރި ވެދާނެތެވެ. ކިތައްމެ ބޮޑު ހިތާމައެއް ތިމާއާ ދިމާވިޔަސް ފަސްނުޖެހޭށެވެ. ތިބާ ދުނިޔޭގައި ތިޔަހުރީ ދުނިޔޭގައި ތިބާ ކުރަންޖެހޭ ކަންތަކެއް ބާކީ ހުރުމުގެ ސަބަބުން ކަން ހަނދާނަށް ގެންނާށެވެ. ތިބާގެ މަންޒިލަށް ވާޞިލް ވުމަށްޓަކައި ފަހަތަށް ނުޖެހި ކުރިޔަށް ދާށެވެ. ލޯބިވެސް ތިބާއަށެވެ. ޙަޔާތްވެސް ތިބާއަށެވެ."
Posts
