މަތިދެކުނު ޕްރޮވިންސްގެ ގދ އަތޮޅު ތަޢުލީމީ މަރުކަޒުގެ އެތްލީޓުން ފަޙުރުވެރި ކާމިޔާބީތަކަކާއެކު އެނބުރި ތިނަދޫއަށް ހިނގައްޖެ

މަތިދެކުނު ޕްރޮވިންސްގެ ގދ އަތޮޅު ތަޢުލީމީ މަރުކަޒުގެ އެތްލީޓުން ފަޙުރުވެރި ކާމިޔާބީތަކަކާއެކު އެނބުރި ތިނަދޫއަށް ހިނގައްޖެއެވެ. އެތްލެޓިކްސް ޓީމް ތިނަދޫއަށް ދިއުމުން ތިނަދޫގަ ހުންނަ ސަރުކާރުގެ އޮފީސްތަކުގެ އިސްވެރިންނާ ތިނަދޫ ރައްޔިތުންނާ ގދ އަތިޅު ތަޢުލީމީ މަރުކަޒުގެ ފަރާތުންވަނީ ގުލްދަސްތާއިން ވަރަށް ހޫނު މަރުޙަބާއެއް ކިޔާފައެވެ. އަދި ސްކޫލާ ހަމައަށް އެތްލީޓުން ގެންގޮސްފައިވަނީ ބޮޑުބެރުޖަހަމުންނެވެ.

ގދ. އޭއީސީގެ އެތްލީޓުންވަނީ މިއަހަރުގެ މަކިޓާއިން އެންމެ އުރުފުރައަކުން ފިޔަވާ ހުރިހާ އުމުރުފުރައަކުންވެސް އެއްވަނަ ހާސިލްކޮށްފައެވެ. އަދި ތިރީސް އަށް ގޯލްޑް މެޑަލާ 29 ސިލްވާ މެޑަލުގެ އިތުރުން އެގާރަ ބްރައުންޒް މެޑަލާއެކު ހަތްދިހަ އަށް މެޑަލް ހޯދާފައެވެ. އދި އޭއީސީގެ އެތްލީޓެއް ކަމުގައިވާ އިނާޔާ ވަނީ ދުވުމުން ޤައުމީ އައު ރެކޯޑެއް ޤާޢިމްކޮށްފައެވެ.  

މަކީޓާ އިންޓަރ އެޓޯލް އެތުލެޓިކްސް ޗެމްޕިއަންޝިޕްގެ އެއްވަނަ، ގދ އަތޮޅު ތައުލީމީ މަރުކަޒު ހޯދައިފި

ހަތަރުވަނަ މަކީޓާ އިންޓަރ އެޓޯލް އެތުލެޓިކްސް ޗެމްޕިއަންޝިޕްގެ އެއްވަނަ، މިމުބާރާތުގައި ރާއްޖޭގެ ދެކުނުން ވާދަކުރި ހަމައެކަނި ސްކޫލް ކަމަށްވާ ގދ އަތޮޅު ތައުލީމީ މަރުކަޒު ހޯދައިފިއެވެ. މިމުބާރާތުގައި ގދ އަތޮޅު ތައުލީމީ މަރުކަޒުގެ ދަރިވަރެއްވަނީ ޤައުމީ ރިކޯޑެއްވެސް އާކޮށްފައެވެ.

މިމަހުގެ ބާވީހުން ފަންސަވީހަށް ކުޅުދުއްފުށީގައި ކުރިއަށްދިޔަ ހަތަރުވަނަ މަކިޓާ އިންޓަރ އެޓޯލް އެތުލަޓިކްސް ޗެމްޕިއަންޝިޕްގައި އެންމެ ކާމިޔާބު ސުކޫލަކީ ގދ އަތޮޅު ތައުލީމީ މަރުކަޒެވެ. އެސްކޫލްވަނީ 16 އަހަރުންދަށުގެ ދެޖިންސްގެ އެންމެ މޮޅު ސްކޫލް ހޯދުމުގެ އިތުރުން 19 އަހަރުން ދަށުގެ ދެޖިންސްގެވެސް އެއްވަނަ ސްކޫލްގެ މަޤާމް ހޯދާފައެވެ. މީގެއިތުރުން މުޅިމުބާރާތުން ދެޖިންސުންވެސް އެންމެ މޮޅު ސްކޫލަކަށް ހޮވިފައިވަނީ ގދ އަތޮޅު ތައުލީމީ މަރުކަޒެވެ.

މިމުބާރާތުން 13އަހަރުން ދަށުން އެންމެ މޮޅު އެތުލީޓަކީ ޖަލާލުއްދީން ސްކޫލްގެ މަރިޔަމް ހަނާ އިބުރާހިމްއެވެ. އަދި ހަމަ މިއުމުރު ފުރައިން ފިރިހެން އެންމެ މޮޅު އެތުލީޓަކަށް ހޮވިފައިވަނީ ހދ އަތޮޅު ތައުލީމީ މަރުކަޒުގެ އިމްދާދް އަލީއެވެ. 16އަހަރުން ދަށުން އެންމެ މޮޅު އަންހެން އެތުލީޓަކީ ގދ އަތޮޅު ތައުލީމީ މަރުކަޒުގެ މަރިޔަމް ޝަރޫނާ އާދިލް ހޮވުނުއިރު ހަމަ މިއުމުރުފުރައިން އެންމެ މޮޅު ފިރިހެން އެތިލީޓަކީ ޖަލާލުއްދީން ސްކޫލްގެ އިބްރާހިމް އާދަމްއެވެ. 19އަހަރުން ދަށުގެ ފިރިހެން އެންމެ މޮޅު އެތުލީޓަކީ ގދ އަތޮޅު ތައުލީމީ މަރުކަޒުގެ އާދިލް ރަޝީދުއެވެ.

މިއުމުރު ފުރައިން އެންމެ މޮޅު އަންހެން އެތުލީޓަކީ މިމުބާރާތުގެ ތަރިއަކަށްވި ގދ އަތޮޅު ތައުލީމީ މަރުކަޒުގެ މަރިޔަމް އިނާޔާ ފާރޫޤްއެވެ. އިނާޔާވަނީ ނަވާރައަހަރުން ދަށުގެ އަންހެންބައިގެ 5000 މީޓަރުގެ ދުވުމުން ޤައުމީ ރިކޯޑެއް ހަދާފައެވެ. މީގެ އިތުރުން މުބާރާތުގެ އެންމެ މޮޅު އަންހެން އެތުލީޓްގެ މަޤާމްވެސް އިނާޔާވަނީ ހޯދާފައެވެ. މުބާރާތުން އެންމެ މޮޅު ފިރިހެން އެތުލީޓަކީ ހދ އަތޮޅު ތައުލީމީ މަރުކަޒުގެ އިމްދާދު އަލީއެވެ.

މިރަސްމިއްޔާތުގައި ވަނަވަނައަށް އައި ފަރާތްތަކަށް މެޑެލް އާއި ހަނދާނީ ލިޔުން ހަވާލުކޮށްދެއްވީ މަތިއުތުރު ޕްރޮވިންސްގެ ޑެޕިއުޓީ ސްޓޭޓް ސްޓޭޓް މިނިސްޓަރ އާދަމް ނަސީރުއާއި މަތިދެކުނު ޕްރޮވިސްގެ ޑެޕިއުޓީ ސްޓޭޓް މިނިސްޓަރ މުހައްމަދު ޝަރީފްގެ އިތުރުން ވަޑައިގެން ތިއްބެވި އިއްޒަތްތެރިންނެވެ. މިމުބާރާތުގައި ވާދަކޮށްފައިވަކީ ތިލަދުންމައްޗަށް ނިސްބަތްވާ ހަތްސްކޫލުގެ އިތުރުން ގދ އަތޮޅު ތައުލީމީ މަރުކަޒްއެވެ. މިމުބާރާތަކީ އެތުލެޓިކްސް އެސޯސިއޭޝަނުން އިންތިޒާމްކޮށްގެން ބޭއްވި މުބާތާތެކެވެ.

އިއްޒަތްތެރި މެމްބަރުން... އަނުއޮރިޔާން ނުވާށެވެ!

ފަހަކަށްއައިސް ސްޓާ ޕްލަސް އިން ދައްކާ "ކަސޯޓީ" ނުވަތަ "ކަހާނީ ގަރް ގަރްކީ" ފަދަ ޑްރާމާތައް ފަހަތައްޖައްސާލުމަށްފަހު އެންމެ މަޤުބޫލް ޓީވީ ސިލްސިލާގެ މަޤާމް ހޯދީ މަޖިލިސްގެ ޖަލްސާތަކެވެ. ލޯބިވެރިންގެ ކުޅިގަނޑު ނުފެނުން ކަމުގައި ވިޔަސް ދީވާނާވެފަ ތިބޭތަން ބައެއްފަހަރު ފެނެއެވެ.

މިހިގާ ރައްޔިތުންގެ މަޖިލީހަށް އެއް އަހަރު ވެގެންދިޔައިރު އަދި ފާސްކުރެވުނީ އެންމެ އަށް ބިލެވެ. ކޮންމެ ޖަލްސާއަކަށް މަދުވެގެން އެއް ލައްކަ ރުފިޔާ ޚަރަދުކޮށްގެން އަޅެފަހެ އިއްޒަތްތެރި މެމަބަރުން ކުރަނީ ކީއްބާއޭ ހިތަށް އަރައެވެ. މަޖިލިސް މިހާރު ސިފަކުރެވެނީ ރައްޔިތުންގެ މަޖީލީހަށްވުރެން ސިޔާސީ ދާދާއިންގެ މަޖިލީހަކަށެވެ. ސަބަބަކީ މިމަޖިލީހުން ރައްޔިތުންގެ ކަންތަށް ބާއްވާފައި އަބަދުވެސް ބަހުސް ކުރަނީ ކޮންމެވެސް ދާދާއެއްގެ އިނާޔަތާއި ބެހޭގޮތުންނެވެ. ނޫނީ ކޮންމެވެސް ދާދާއެއްގެ ވިޔަފާއި ބަގުރޫޓޫވިޔަ ނުދިނުމަށެވެ. ނުވަތަ ކޮންމެވެސް ދާދާއެށް ކޮށްފައިއޮތް ބޮޑު ޖަރީމާއެއް ނެތިކޮށްލަންށެވެ.

އިއްޒަތްތެރި މެމްބަރުން މީޑިޔާއިން ނުދައްކައިގެންވެސް މިދިޔަ ހަފްތާގައި ޖަލްސާ މެދު ކަނޑާލައި ނިޒާމީ ނުކުތާގެ ސުނާމީއެށް މަޖިލިސް ކުރާ ގެއަށް އެރިއެވެ. އަޅުގަނޑު ހިތުގަ އުފެދޭ ސުވާލަކީ، ކީއްވެގެންތޯ އިއްޒަތްތެރި މެމްބަރުން އަމިއްލަޔަށް "އޮނު އޮރިޔާން" ވާތަން އެހެންމީހުންނަށް ދައްކަން މިއުޅެނީ؟

ދިވެހިރާއްޖެ ނުދެކޭފަދަ ސިޔާސީ މިނިވަންކަމަކާއި ޒަމާނުންސުރެން އޮންނަ އަދުލު އިންސާފުގެ ނަހަމަކަން އެއްވީމަ އަދި މިވާވަރު ކުޑައޭ ހިތަށް އަރައެވެ. އިންޑިޔާގެ ޓާޓާ ކުންފުނީގެ މުވައްޒަފުންނަށް ވުރެ މަދު އާބާދީ އެއް އޮންނަ މިޤައުމުގެ އެންމެހާ ކަންތަށް އެފުށް މިފުށަށް ޖެހި މީސްތަކުންނަށް ވާނުވާ ނޭގި ޒުވަނުންގެ ތެރެއިން ބޮޑުބަޔެއް ސައުވީސް ގަޑި އިރު ހަމައިގައި ނުހުރެފައި މުސްކުޅިވާ ހާލު ދެފައި ދަނޑިޔަށް ހީސްލެވިފައި ތިބުން މީ ހައިރާން ވާންޖެހޭ ނުވަތަ ކަންބޮޑުވާން ޖެހޭ މައްސަލައެކެވެ.

މި ޤައުމުގައި ހަމައިނެއްޓި ހައްދުފަހަނަޅާފައިވާ ކަންތަކުގެ ވާހަކަ އެހެން ފަހަރަކުން ލިޔާނަމެވެ. މި ލިޔުމުގައި ހާމަކޮށްލަން ބޭނުންވަނީ އިއްޒަތްތެރި މެމްބަރުން އެމެމްބަރުން ތަމްސީލުކޮށްދޭ ރައްޔިތުންގެ ކަންތަކުގައި ނޫޅޭ ވާހަކައެވެ. ޕާޓީގެ ޓިކެޓުން އަޔަސް ރައްޔިތުން ނޭދޭގޮތަކަށް އެއްވެސް މެމްބަރަކު އަމަލުކުރުމަކީ ސުލޫކުން ބޭރުކަމެކެވެ. އަދި އެފަދަ ކަމަކަށް އެއްވެސް ޕާޓީއަކުން ގޮވާލުމަކީ އެޕާޓީވެސް ތަސައްރަފު ނުފުރޭ ކަމެވެ.

މި ލިޔުމުގައި އިއްޒަތްތެރި މެމްބަރުންގެ ރަނގަޅުކަންތަކުގެ ވާހަކަވެސް ދައްކާކަށް ނެތީމެވެ. މީގެ މާނައަކީ އެ މެމްބަރުންގެ އެއްވެސް ރަނގަޅުކަމެއް ނެތީކީނޫނެވެ. ރަނގަޅުކަންތަށްވެސް ބައިވަރެވެ. އެހެނަސް މިފަހަރު މިފަހަރު އޮތީ "ނ" ގެ ވާހަކަތަކެވެ...

(ނުނިމޭ)  

ހުވަދުއަތޮޅު ދެކުނުބުރީގެ ފުރަތަމަ އަތޮޅުވެރިޔާ

ޢަބުދުﷲ ޙިލްމީ :


ހުވަދުއަތޮޅު ދެބައި ކުރުމަށްފަހު ދެކުނުބުރީ ގެ އެންމެފުރަތަމަ އަތޮޅުވެރިޔަކީ ގައްދޫ ވައިލެޓްވިލާ އަލްފާޟިލް ޙުސައިންމަނިކެވެ. އޭގެ ކުރިން ގައްދޫގެ ކަތީބަކަށްހުންނެވި ވެރިޔާއެވެ. އޭނާއަކީ ރައްޔިތުންނަށް އޯގާތެރި ހެޔޮކޮށް ކަންތައްތައް ކުރެއްވި ބޭފުޅެކެވެ. ގައްދޫގައި އަތޮޅުއޮފީސް ހިންގެވުމަށްފަހުގައި ދެވަނަފަހަރަށް ތިނަދޫގައި މީހުން ވަޒަންވެރިވެ އަތޮޅުއޮފީސް ތިނަދޫއަށް ބަދަލުވުމުން ތިނަދޫގައި ހުންނެވި އެވެ. ގދ- އަތޮޅުގެ އެންމެ ގިނަމީހުންގެ އިޙްތިރާމް މިހާތަނަށް ލިބިވަޑައިގެންނެވި ހަމައެކަނި ވެރިޔަކީވެސް އަލްފާޟިލް ޙުސައިންމަނިކު ކަމުގައި އަޅުގަޑު ދެކެމެވެ. އެޒަމާނަށް ބަލާއިރުވެސް އަތޮޅުގެ ކުރިއެރުމާއި ރައްޔިތުންގެ މަންފާއަށްޓަކައި ކޮށްދެއްވެންއޮތް ހުރިހާކަމެއް ކޮށްދެއްވޭތޯ ބައްލަވައި ކުރެއްވުމާއި އަދި އޭނާގެ އާދަޔާއި ޚިލާފު މިޒާޖާއި އޯގާތެރިކަމަކީ މިކަން މިހެންވުމުގެ ވަރަށްބޮޑު ސަބަބެއް ކަމުގައި އަޅުގަޑު ދެކެމެވެ.

ގައްދޫގައި އަތޮޅުވެރިއަކަށް ހުންނެވިއިރުވެސް އިޖްތިމާޢީ ކަންކަމަށް ޚާއްޞަކަމެއް ބެހެއްޓެވިކަން އެގެއެވެ. އެކިއެކި މުނާސަބާތަކަށް ރަށްރަށުގެ އަބާތުރަ ފިލުއްވެންއޮތް ވަރަކުންފިލުއްވައި އެކުވެރިކަމާއި ގުޅުންބަދަހި ކުރެއްވުމުގެ ޙަރަކާތްތައް ގައްދޫގައި ވެސް ހިންގެވިއެވެ. އަތޮޅުގެ ރަށްރަށުން އިޖްތިމާޢީ ކުޅިވަރުތަކުގެ ޓީމްތައް ގައްދޫއަށް ގެންދަވައި އަތޮޅުއޮފީހުގެ ބެއްލެވުމުގެ ދަށުން ހުރިހާ އިންތިޒާމެއް ހަމަޖައްސަވައި ވަރަށްފޯރީއާއި ޖޯޝްގައި ޒުވާނުންނާއި މީހުން ކުޅިވަރުތައްވެސް ކުޅެއުޅުނެވެ. ގައްދޫގެ ކުދި ބޮޑު އެންމެންގެ ޢަމަލީ ތަރުޙީބު އޮވެގެންނެވެ. ޙުސައިންމަނިކުގެ އަތޮޅުވެރިކަމުގައި އެރަށަށް ޒިޔާރަތްކުރި އެއްވެސް ކުޅިވަރުގެ ޓީމަކަށް އެރަށުގެ އެއްވެސްކަމަކާއި މެދު ހިތްހަމަނުޖެހިގެން އުޅޭކަށް ނުޖެހެއެވެ. ވާދަވެރި ކުޅިވަރުތަކުގައި ކުރިމަތިލާ ދެޓީމެއްގެ ދެމެދުގައި ކުޅިވަރުގެ މައިދާނެއްގައި ކުޅިވަރުގެ ރޫޙާއި ޚިލާފު ކުޑަކުޑަ ކަމެއްހިގާފައިވިއަސް އަތޮޅުގެ އެއްވެސް ރަށެއްގެ އެއްވެސް ކުޅުންތެރިއަކަށް ހިނިތުންވުމާއި އުފާވެރިކަމާއި އެކުވެރިކަން ނޫނީ ޙުސައިންމަނިކުގެ އަތޮޅުވެރިކަމުގައި ގައްދޫއިން ފެނިފައިނުވެއެވެ. މިހާޞަރީޙަކޮށް މިވާހަކަ ލިޔަންޖެހުނީ އޭރަށް ބަލާއިރު ދުރުނޫން މާޒީއެއްގައި ގައްދޫއާއި މެދު އެކަށީގެންނުވާ ކަންތައްތަކެއް އަތޮޅުގެ ބައެއް ރަށްރަށުގެ ބައެއް މީހުންގެ ފަރާތުން ހިގާފައިވުމާއެކުވެސް ޙުސައިންމަނިކުގެ ވެރިކަމުގައި އިޖްތިމާޢީ ޢަދާލަތުގެ ފުރިހަމަކަން އޮތް ބޮޑުކަމާއި ސިޔާސީ ހަމަޖެހުމުގެ ބޮޑުކަމުން އެރަށުގައި ކުޑަނަމަވެސް ނުތަނަވަސްކަމެއްގެ އަސަރު ބޭރުންއަރާ ބަޔަކަށް ފެންނަށް ނެތުމުންނެވެ. ޙުސައިންމަނިކަކީ އަޅުގަޑު ދުށްގޮތުގައި ކުރުގޮތަކަށް ބަޔާންކުރަންދަތި ވަރަށް އާދަޔާއިޚިލާފު ސިޔާސަތެއްގެ ވެރިއެކެވެ.

ހަވަރުތިނަދޫން މީހުން ބާލައި އެ ރަށުގެ ގިނަމީހުން ދަތިހާލުގައި ޖެހިގެން ކަންބޮޑުވެގެން އުޅުނުއިރު އެމީހުންނަށް ކާބޯތަކެތީގެ ގޮތުންނާއި އެހެނިހެން ގޮތްގޮތުންވެސް އެންމެބޮޑަށް އެހީތެރިވެދެއްވި އެއްބޭފުޅަކީވެސް އަލްފާޟިލް ޙުސައިންމަނިކެވެ. ގައްދޫ އަލްފާޟިލް ޢަލިކަލޭގެފާނާއި އޭރުގެ އަނބިކަބަލުން އަލްފާޟިލާ އާމިނަތު އިސްމާޢީލް އަކީވެސް ފާހަގަ ކުރެވޭ ދެބޭފުޅުންނެވެ. އާމިނަތު އިސްމާޢީލް އަކީ ގައްދޫ އަލްފާޟިލް އިސްމާޢީލް ވަތަބަޑޭރިކަލޭގެފާނު ގެ ދަރިކަނބަލެކެވެ. ކާބޯތަކެތީގެ ގޮތުން ބަޔަކަށް ދަތިވި މިކަހަލަ ބޭނުންތެރި ވަގުތެއްގައި މިބޭފުޅުން މިދެއްކެވި ހެޔޮފުޅު ކަމަކީ ފާހަގަކުރަންޖެހޭ ކަމެކެވެ. ޢިބުރަތްތެރި ކަމެކެވެ. މިލިޔުމުގައިވާ ވާހަކަތައް މި ލިޔަނީ އެވާހަކަތައް މީހަކު ހަމައެކަނި ބުނީތީއެއް ނޫނެވެ. އެކަން ރަގަޅަށް ދެނެހުރެގެންވެސް މެއެވެ. އަޅުގަޑު ނޫން މިފަދަ ކިތަންމެބަޔަކުވެސް އެބަތިއްބެވެ. ހަވަރުތިނަދޫން މީހުން ބާލާފައި އޮތްއިރު ކާބޯތަކެތި ހޯދަން ބަޔަކު ގައްދޫއަށް ކުރި ދަތުރެއްގައި އަޅުގަޑަށް ދެވުނެވެ. އެފަހަރު ލޮލަށްފެނި ސިކުޑިއަށް އެގުނުކަންތައްތަކެއްވެސް އެބަހުއްޓެވެ. ގައްދޫގައި އަތޮޅުއޮފީސް ހިންގިއިރު ތިނަދޫން އެ ރަށަށް ދިޔަ ކުޅިވަރުގެ ޓީމްތަކާއެކު ވެސް ގިނަފަހަރު އަޅުގަޑު އެރަށަށް ދިޔައީމެވެ. އަދި ޙުސައިންމަނިކުގެ އަތޮޅުވެރިކަމުގައި ތިނަދޫގައި ހުންނެވިއިރު އޭނާ ވެރިކަމުގެ ގޮތުން ކުރައްވާ ގިނަކަންކަން އެންމެކައިރިން ފެންނަހިސާބެއްގައި ވެސް އެއްދުވަސް ވަރު އަޅުގަޑަށް ވަނީ އުޅެވިފައިމެއެވެ.

ޙުސައިންމަނިކަކީ ގދ- އަތޮޅުގެ އެންމެގިނަމީހުންގެ އިޙްތިރާމް މިހާތަނަށް ލިބިވަޑައިގެންނެވި ހަމައެކަނި އަތޮޅުވެރިޔާ ކަމުގައި ހާމަކޮށްފައި އެވަނީ ގދ- ގެ ގިނަ އަތޮޅުވެރިންގެ އަރިހުގައި އަޅުގަޑަށް މަސައްކަތް ކުރެވުމުގެ ފުރުޞަތުލިބިފައިވާތީ އާއި މިނޫނަސް ގދ- ގެ އަތޮޅުވެރިކަން ކުރެއްވި ބޭފުޅުންނާއި މެދު މީހުންގެ އިޙްތިރާމް އޮންނަގޮތެއް މުޅީން ނޭގޭވަރަށްވުރެ ދުރަށް ދެވިފައި ނުވުމާއެކުގައެވެ. މިހާރު އަވަހާރަވެ ގިނަދުވަސްތަކެއް ވެފައިވާ ބޭފުޅަކާމެދު އެބޭފުޅެއްގެ ކުރު ތަޢާރަފެއް ދެވިއްޖެކަމަށް ގަބޫލުކުރެވެއެވެ. މިއީ އެބޭފުޅަކާއިމެދު އަޅުގަޑު ދުށްގޮތެވެ. އަޅުގަޑަށް ގަބޫލުކުރެވޭ ގޮތެވެ. ހުވަދުއަތޮޅު ދެކުނުބުރީގެ ފުރަތަމަ އަތޮޅުވެރިޔާ ގައްދޫ ވައިލެޓްވިލާ އަލްފާޟިލް ޙުސައިންމަނިކު އަވަހާރަވީ އަތޮޅުވެރިކަމުން ވަކިވެވަޑައިގެން ގައްދޫގައި ހުންނަވަނިކޮށްނެވެ. މާތް ﷲ އެމަރްޙޫމަށް ސުވަރުގޭގެ ދާއިމީ މަތިވެރި ނިޢުމަތް ލައްވާށިއެވެ.

ކާސިންބެ: އަނެއްކާވެސް ބައިބައިވުމުގެ ކުޅިގަޑު ފެށުމުގެ މަގުމަތީގައި

މާތްﷲގެ ޙަޒުރަތުން އެ ކުށަކަށް މަޢާފް ނުލިބޭ ހަމައެކަނި ކުށަކީ އެކަލާންގެއާއި ޝަރީކަކުޅައުމެވެ. ދެން ޖެހިގެން އަންނަނީ ދެބައެޑުވުމެވެ. ނުވަތަ ދޭތެރެ ޖައްސައި އެހެން މީހުންގެ ނަފްސުލް ޒީނަތް ނަގާލުމެވެ. މިކުށަށް ތަބާވެ މާތްﷲގެ ހަޒުރަތުގައި މަޢާފަށް އެދުނަސް އަދި އެކުށަށް އެކަލާންގެ މަޢާފްނުދެއްވައެވެ. އެހެނީ އެއީ އެހެންމީހެއްގެ ހައްޤަކަށް އަރައިގަތުމުން އެމީހާގެ ހިތްހަލާލް މިކަމުގައި ބޭނުންވާތީވެއެވެ.

ކޮންމެއަކަސް ދޮގުހެދުމާއި ދޭތެރެޖެއްސުން ވަނީ އަޅުގަނޑުމެން ތަބާވާ މާތް އިސްލާމްދީނުގައިވެސް ނަހީކުރެއްވި އެންމެ ބޮޑެތި ކަންތަކުގެ ލިސްޓުގައި ހިމެނިފައެވެ. ބައެއްފަހަރު ދޮގު ހެކިދޭ މީހުންނާއި ދޭތެރެ ޖައްސައި އެހެން މީހުންގެ މުޅިދިރިއުޅުން ހަލާކުކޮށްލާ މީހުންނަށް ޤާނޫނީގޮތުން ތަންކޮޅެއް ބޮޑު އުޤޫބާތެއް ދެވޭނަމައޭ ހިތަށް އަރައެވެ.

މުޖުތަމަޢުން މިހާރަކަށް އައިސް ދޮގުވާހަކަ ހަދައިގެން ދެއްކުމާއި އަނެކާގެ އަބުރާއި ޝަރަފު ނަގާލުން މިވަނި ލިޔުންތެރިންނަށް މިސްރުން ގެންނަ ތުނޑުކެޑި ގަލަމުން ލިޔެލާ އޮމާން ފަށުވި ޚިޔާލީ ވާހަކައަކަށް ވެފައެވެ. އަދި ކިޔުންތެރިންނަށް ވަސްމީރު މާމެލާމެލިން ފުރިފައިވާ ގުލްޒާރެއްފަދަ ހިތަށް ފިނިކަންގެނެސްދޭ ރޯޅިއަކާށް ވެފައެވެ. ފާރިސީން ކިޔާ "ސިވިލައިޒް" ވުމަކީ މީކަމަށް ދިވެހީންނަށް ހީވަނީތޯއްޗެވެ. "ޗަކޮޔާ މިއީ އޫރަޕެއް ނޫނޭ!" އެމީހުންގެ ސަޤާފަތާއި އަހަރުމެން އުޅޭ ސަޤާފަތާއި ދީނާއި އުސޫލުތަށްވެސް ތަފާތެވެ.

ގިނަ ފަހަރަށް މީހުންގެ އަބުރާއި އިއްޒަތް ނަގާލާފަދަ ކަންތަށް ފެންނާނީ ސިޔާސީ މައިދާނުގައެވެ. ވާނީވެސް އެހެންތާއެވެ. އަނެކާގެ ބޮލުގައި ފައިންޖަހާފައިނޫންގޮތަކަށް ކުރިއަށްދާން ނޭގޭ މީހުން އެންމެ ގިނައީ އެމައިދަނުގައެވެ. އަދި ދީނާއި ސަޤާފަތާއި ނުވިތާކަށް އާޢިލާވެސް އެމީހުންގެ އެދުމަށްޓަކައި ގުރުބާންކުރަން ތައްޔާރަށް ތިބި ބަޔަކު ތިބީވެސް ހަމަ އެ މައިދާނުގައެވެ. އަމިއްލަ މީހާ ނަޖިހުން ފޯވެގެންހުރެ އަނެކާއާއި ދިމާލަށް އިނގިލި ދިއްކުރާ މީހުންވެސް އެންމެ ގިނަވާނީ އެ މައިދާނުގައެވެ.

ސިޔާސީ ގޮތުން ކުރި ހޯދުމަށާއި ޚިޔާލު ވިއްކަން ނުވަތަ ބަހުސްއަކުން ނުކުތާއެއް ހާމަކޮށްދޭން މި މުޖުތަމަޢުގައި ޒާތާއި ބެހުމަކީ ނުމެނުވާނެ އާދައެކެވެ. ގަޔަށް ބޮލަށް ނާރާކަން ނަސީބެވެ. މިއުޅޭ ސިޔާސަގެރިންގެ ކުޅޭކުޅިގަޑު ސުލޫކީ މިންގަޑެއް ނެތުމަކީ އެމީހުންގެ ހަށްޓަށް ލުޔެއްނުލިބޭ ސަބަބެވެ. މަޢާފް ކުރަށްވާށެވެ! ބަޔެއްގެ އަބުރާއި ބެހެނީކީ ނޫނެވެ. އެކަމަކު މުޅިމުޖުތަމަޢުވެސް އެ މީހުންގެ ސިޔާސަ އަމަލުތަށް ހަރުއަޑުން ކުށްވެރި ކުރާނެއެވެ.

ކުރިމަތިވަމުން މި އަންނަނީ ދިވެހިރާއްޖޭގެ ހިންގުން ލާމަރުކަޒީ އުސޫލުން ހިންގަންވެގެން ރައްޔިތުންގެ މަންދޫބުންތަށް ޤާނޫނު ބުނާގޮތުގެ މަތީން ރައްޔިތުން ތަމްސީލުކުރާ ގޮޑިތަކަށް އިންތިޙާބްކުރުމަށް ނެގޭ ވޯޓުގެ ދުވަސްވަރާއެވެ. އެއްވެސް މީހަކަށް އޮލިފައި ނޯންނާނެފަދައި މިއީ އެކަކު އަނެކަކުގެ ގައިން މަސްކެއުން އެންމެ ބޮޑުދުވަސްކޮޅެވެ. އެހެން ގޮތަކަށް ދަންނަވާނަމަ "މިނިކާ ރާއްޖޭ" ފެނިގެންދާ ދުވަސްވަރެވެ. ކެޔޮޅާ ބޭބޭ ދޫންޔާ އެވެ. މިނިކާ ރާއްޖޭ ގަސްކަރަ އެހާ އަމާނެއް ނުވާނެއެވެ. ބަލާފަ އަންނަން ދާނެކަމެއްނެތެވެ. ދަންމާނަށް ދޫކޮށް ހޭރިޔާކޮށްލަންވީ މުޖުތަމަޢުގެ ހަމަޖެހުމާއި އެހެންމީހުންގެ އަބުރާއި އިއްޒަތު ރައްކާތެރިކުރުމަށެވެ. މާކަނޑުގައި ހިތްތްވަރުކޮށްފައި އަޅުގަނޑުމެންގެ އުޅަދު ނާމާންކަމުގެ ތެރެއަށް ފެތުނަނުދޭންށްވެ. ދޭތެރެ ޖައްސާހަދާމީހުން އަދި ޅައީއެވެ. ބޮޑުވީމް "އޯކޭ" ވާނެތޯއްޗެ.